熱門話題.com

高收入剩女：似古天樂就夠
統計處最新調查，40歲或以上未曾婚嫁的剩女創新高，比2001年大增八成。
今天，大部份剩女都是事業有成的專業人士，以寄情工作為「唔恨嫁」的藉口，一拖再拖，至青春耗盡，於是35歲成為一個關口，眼見身邊朋友生兒育女，越來越急，都希望在高齡產婦期前，最後衝刺找真命天子。
有配對公司提醒剩女，不願放下身段，成功率很低。

28歲女Vivian未熟先急，望配對公司能幫她在30歲前找到老公。
根據今年政府統計處公佈首季的《綜合住戶統計調查按季統計報告》，40歲或以上的單身熟女佔13.3萬人，比2001年7.5萬人，增近八成。
剩女有增無減，主因港男北上尋伴侶。即使口說「唔恨嫁」的港女，眼見自己已近熟透，不少都會向婚姻介紹所求助。

配對公司負責人Terry爆料，年薪80萬以上的港女最不切實際。

為放鬆心情，配對公司要求徵婚男女先玩遊戲。
年薪30萬唔願一齊捱
專為中區專業人士配對的顧問公司負責人Terry爆料，指大部份未婚熟女都是專業人士，「當中不乏中環區人才，包括醫生、律師、銀行家、大企業私人助理或教師等，而35至40歲的女人更佔四成，希望趕及高齡產婦前結婚仔」。
Terry直指港女擇偶非常有趣，根據不同收入有不同考慮；年薪80萬以上女士，會要求年薪、學歷、品味相約的男士，這類剩女多數會開出不切實際條件，也是最難搞的一種。「例如一個年薪80萬的女客人，希望找一個學歷、品味相約、唔使太靚仔，差唔多古天樂咁就夠，可以光頭但又要型」。
而年薪30萬左右的女士，就一天到晚發夢想嫁有錢人，她們都愛說同一句話，「我都賺唔多，唔通仲要同另一半捱咩？」
相反年薪50萬左右的女士，會覺得自己賺錢不多，反而會願意和未來一半互相扶持，亦不介意另一半條件和薪金比自己低，這一類是最實際。
Terry分析剩女形成原因，主因是工作以外，平日不願對外溝通，「收工唔出去，又點識到新朋友呢？」加上現代女性獨當一面，薪酬學歷與男人看齊，更加不願降低要求，眼角只會越來越高，「佢哋以自己條件為標準揀男人，仲要Man、細心、遷就自己、照顧一切，邊有咁着數㗎？有都一早俾人識咗啦！」
「好多女士以為25至30歲仲有青春，可以揀多幾年，到了35歲先心急衝刺經已太遲」。他形容35至40歲的女士，身心變化最大，工作的滿足感已不能填補寂寞，這時候醒覺已經太遲了，「年紀相近的男人已有歸宿，你揀人，人哋都揀緊你㗎」。

港女在事業上所向無敵，但找對象卻一無所知，還要專人教導。

Vivian逐一挑選合眼緣對象。
28歲女配對公司「尋夫」
28歲的Vivian更是未老先急，她擁有管理學士及英國註冊會計師執照，現職石油公司收購買賣及私人助理，月薪三萬多，是中港兩地工作的「港飄」，沒有時間識人，但又怕自己很快年過30變剩女，故心急如焚上配對公司「尋夫」。「18至25歲時恃住自己青春，睇唔起啲男人，成日想搵個高大靚仔、家底好、遷就我嘅白馬王子，但到26歲時，才發現自己眼角過高錯失不少良緣」。
自此之後，她開始改變自己心態，「現在只希望揀一個條件同自己差唔多嘅伴侶，打工仔都唔緊要，最緊要上進同溝通到就得」。Vivian亦不介意別人知道她找配對公司，「我呢啲年紀識男仔係好正常，應該諗拍拖結婚生仔，平時工作太忙，又進修，冇時間去玩，圈子自然細，從正確途徑去識人，總好過落蘭桂坊識人，如果現在仲介意別人目光嗰啲女仔，已經唔再叫傳統，而係封建。」
「工作中眼見好多40幾歲的女同事全部都未結婚，我真係開始驚喇」，她希望30歲前可以搵到Mr. Right結婚生仔，不用孤獨終老。（蘋果日報 記者：羅鈺歡 攝影：胡智堅）
高收入剩女 原文: 專題--高收入剩女：似古天樂就夠